Mès de 900.000 € tà bastir 4 viuendes de loguèr assequible
A concors es òbres tà pisi de 57 e 76 mètres quarrats e 9 places de parcatge
Er edifici se bastirà ena plaça dera Pica de Salardú. - EDGAR ALDANA
Er Ajuntament de Naut Aran a trèt a concors eth bastiment d’un edifici de quate viuendes en Salardú qu’a previst destinar a loguèr a prètzi assequibles. Eth sòn pressupòst ascendís a 916.679 èuros e arribe dempús qu’eth plen aprovèsse es tèrmes de licitacion eth passat 13 de hereuèr. Serà ena plaça dera Pica e eth consistòri a intencion de destinar-lo a collectius coma joeni, familhes e trabalhadors de temporada deth sector toristic.
Er edifici aurà dues viuendes de 57 mètres quarrats, damb dues abitacions e un lavabo, e d’autes dues de 76 mètres quarrats damb tres dormitòris e dus lavabos. Totes eres auràn en ua unica zòna era codina e eth mijnjador. Atau cònste en projècte, que resèrve tanben ua superfícia de 231 mètres quarrats tà abilitar nau places de parcatge. Ad açò se somen espacis comuns e terrasses, per çò qu’era superfícia bastida serà de 626 mètres cubèrs.
Er ajuntament de Naut Aran arreceberà aufèrtes enquia mejans deth mes de març abans d’adjudicar es òbres e, un viatge formalizat eth contracte, era enterpresa adjudicatària aurà de bastir er edifici en un tèrme de 15 mesi.
Amassa damb eth bastiment d’aguest blòc de viuendes, eth plen municipau de Naut Aran aprovèc tanben eth passat dia 13 es darrèri cambis requerits pera Comission d’Urbanisme dera Val d’Aran entà hèr possible un edifici de seishanta viuendes de 30 mètres quarrats ena zòna de Baqueira. Eth consistòri, titulars des terrens, a era intencion d’autrejar-les en concession entath bastiment des viuendes. Aguestes poiràn acuélher des de trabalhadors dera sason toristica d’iuèrn enquia joeni e persones en situacion de vulnerabilitat.
Era dificultat tà trapar viuenda de loguèr en Aran, en especiau pera proliferacion de viuendes toristiques (era Val n’a mès de 1.600 des mès de 4.600 en tota Lhèida) a hèt que, enes darrèri ans, trabalhadors de temporada deth sector toristic se lòtgen en autocaravanes o en forgonetes camperizades. Ath delà, aguest collectiu a denonciat en fòrça escadences non dispausar d’emplaçaments adequadi tà estacionar es veïculs enes que pernòcten.
