Era residéncia de Les ultime es òbres entà daurir en 2025

Era residéncia de Les, un equipament es òbres deth quau comencèren en 2019, afrònte ara era sua rècta finau, damb eth prètzhèt de daurir es sues pòrtes en 2025. Eth Conselh Generau a licitat òbres entà reformar eth sòn interior, dempús de revisar es besonhs deth territòri aranés coma conseqüéncia dera experiéncia derivada dera pandèmia de coronavirus en 2020, qu’a comportat importanti cambis en toti es equipaments sanitaris e assistenciaus. En concrèt, aguesta reforma interiora plantège milhorar era foncionalitat der equipament en tot includir naui espacis assistenciaus com ua sala de fisioterapia e ua auta entara estimulacion cognitiva, atau coma ua perruqueria e un espaci de codina entà qu’eth centre foncione normaument en cas d’incidéncia en servici de catering. Tanben s’abilitaràn espacis de minjador en cadua des plantes.

Eth projècte, damb un pressupòst d’uns 315.000 èuros damb IVA, includís era urbanizacion exteriora deth pati des residents, entre er edifici e eth lhet der arriu Garona, en tot configurar un petit passeig que facilite ath sòn torn er accès de veïculs d’assisténcia. Hònts deth Conselh preven qu’era residéncia age capacitat tà 32 persones e compde damb un centre de dia damb capacitat tà ues autes 25, en tot ampliar atau es servicis en matèria d’atencion sociau qu’aufrís eth Conselh a trauès deth SABS. En aguesta prumèra fasa se dauririen sonque es tres prumères plantes der edifici, mentre que s’estudien es usatges des autes dues plantes, damb er objectiu de curbir es besonhs deth territòri coma era atencion ara discapacitat o era dependéncia.Enes pròplèus setmanes ei prevista era crompa deth mobiliari interior, damb ua inversion d’ath torn de 300.000 èuros.