Aran Park barre era campanha d'ostiu damb 20.000 visitaires

Era biodiversitat pirenaica qu’abite enes installacions d’Aran Park, en Bossòst, atrè cada an a milenats de visitaires. Eth parc de fauna en semilibertat a registrat enguan nivèus d’afluéncia de visitaires coma enes ans anteriors ath dera pandèmia deth coronavirus (2019). En concrèt, es sòns responsables afirmen auer arrecebut uns 20.000 visitaires pendent es mesi d’ostiu, mentre que calculen barrar era campanha d’enguan damb un totau de 49.000.

Gemma Segura, ua des cuedadores deth centre, explique que “auem observat un cambi de tendéncia respècte a dètz ans ençà, quan inaugurèrem eth centre”. Apunte que mentre qu’abans es visites èren fòrça repartides pendent tot er ostiu, eth mes d’agost concentre a dia d’aué grana part d’eres. “Eth hèt qu’agen auançat er inici deth cors escolar a fòrça a veir”, comente. D’un aute costat, ua des principaus nauetats d’enguan -e qu’a causat grana expectacion autant entre es mès petiti coma enes adults- ei eth neishement d’un lop canadenc eth passat mes d’abriu. Siguec batiat coma Persi e es sòns cuedadors asseguren que dejà ei un membre mès dera lobatada que formen un totau de ueit exemplars. Tanben i auec neishements de craba ispanica e marmòtes, e s’an milhorat es pasarèlles de diuèrsi espacis. E ei qu’Aran Park ei eth larèr de mès d’un centeat de bèsties en semilibertat, entre es que se trapen es ossi, cèrvis, lueires, arrianglos o eth gatilop. Ena madeisha linha, era activitat mès demandada aguesta sason siguec era de descurbir eth trabalh d’un cuedador, ena qu’es participaires acompanhen as trabalhadors deth centre ath madeish viatge qu’interactuen damb quaques des bèsties que viuen en semilibertat, tostemp survelhadi. Pendent er an son quate es cuedadors que trabalhen en centre, totun, enes mesi de nauta afluéncia toristica, eth numerò s’incremente damb personau entath bar, mès cuedadors e vigilància tà aufrir un servici mès complèt.