Renauissen era entrada dera glèisa de Montcorbau

Eth Conselh Generau d’Aran amie a tèrme trabalhs tà recuperar era cubèrta dera entrada dera glèisa de Sant Estèue de Montcorbau, en Vielha e Mijaran. Consistissen ena substitucion des vigues en mau estat, modificar eth desnivèu entà perméter un milhor enlumenat naturau dera portalada e eth tractament preventiu de tota era husta. Es trabalhs an un còst totau de 12.063 èuros e formen part des accions enes bens immòbles d’interès artistic o istoric dera Val d’Aran. Era Sindica d’Aran, Maria Vergés, manifestèc que “era nòsta volentat passe per sajar d’actuar en toti es monuments patrimoniaus qu’actuauments patissen quauqua problematica pendent aguesta legislatura tà seguir en tot conservar eth nòste patrimòni”. Era pòrta d’accès ara glèisa se trapaue actuauments incrustada jos era cubèrta. Se tracte d’un portau monumentau damb dus batents de husta trabalhada, damb un frontau d’estil barròc, dessús d’aguest, incrustada ena façada, ua estèla de marbe paleocristiana decorada damb relèus qu’ei era unica d’aguestes caracteristiques que i a en Aran. Aguesti e d’auti elements passauen desapercebudi pera pòga lum qu’entraue.