Cent alumnes d'ESO dedicaràn 10 ores a servicis ath municipi

Un centeat d’alumnes de tresau d’ESO der Institut d’Aran participaràn aguest cors en programa de servicis comunitaris que metec en foncionament est an passat er Ajuntament de Vielha e Mijaran. En totau, cada alumne dedicarà dètz ores de trabalhs de servici a trauès de diuèrsi servicis e activitats publiques. Poiràn desvolopar es sues practiques enes principaus equipaments publics: era escòla mairau Era Cunhèra; eth Palai de Gèu; eth centre de Joeni Antara; era Bibliotèca de Vielha e era residéncia Sant Miquèu, atau coma era activitat dera Marcha Nordica. S’assolide atau era pròva pilòt iniciada eth passat an damb 90 alumnes damb er objectiu de corbir es besonhs der entorn e participar activaments ena vida sociau deth municipi. Eth còsso d’educacion, Alberto López, expliquèc que “credem qu’ei fòrça positiu entar alumnat der institut, pr’amor qu’era experiéncia les servirà tà madurar e formar-les de cara ara sua vida adulta, en tot ajudar-les a conéisher coma foncione eth dia a dia dehòra der airau escolar”. 

D’un aute costat, era escòla mairau Era Cunhèra de Vielha a iniciat aguest mes d’octobre corsi de formacion ath sòn personau sus taules d’experimentacion, nomentada ‘Minimundo y piezas sueltas’; literatura adaptada ara psicomotricitat, jos eth nòm ‘Cuentomotores’; activitats damb lum; programacion de situacions d’aprenendissatge e recorsi d’evaloracion. Aguesta formacion a coma prètzhèt dotar ath centre des coneishements de besonh entà que poguen desvolopar es sòns ahèrs pedagogics e didactics damb er alumnat.

Collaboracion damb er AFA

Er Ajuntament de Vielha e Mijaran destinarà aguest cors 6.000 èuros ara Associacion de Familhes e Alumnes dera Escòla Garona damb eth prètzhèt de subvencionar era crompa de nau equipament informatic entar alumnat de primària. Era aportacion tanben anarà destinada a quinsevolh activitat qu’er AFA organize laguens o dehòra deth centre escolar.