Liciten era museizacion dera Casa deth Haro

Era Casa deth Haro de Les, eth centre d’interpretacion des Hèstes deth Huec, serà ua realitat abans deth pròplèu ostieu. Eth Conselh Generau a trèt a licitacion es òbres tà elaborar eth contengut museugrafic deth nau projècte, qu’acuelherà un edifici qu’enquiar an 2010 siguec era sedença dera bibliotèca municipau. Siguec reformat tà acuélher aguest projècte culturau hè quate ans gràcies a ua subvencion deth departament de Cultura, qu’includic ua ampliacion deth sòn volum arquitectonic.

En 2025, en tot coincidir damb eth detzau aniversari dera presentacion dera candidatura transtermierèra de 63 pòbles tà declarar es hèstes deth huec coma Patrimòni Immateriau dera Unesco, daurirà fin finau es sues pòrtes, damb eth prètzhèt de devier un lòc que pogue difóner era istòria d’aguest element deth patrimòni hestiu, unic en mon. Eth baile de Les, Andreu Cortés, expliquèc qu’es òbres de museizacion començaràn aguest iuèrn, damb er objectiu d’inaugurar eth musèu abans dera celebracion des pròplèu hèstes deth huec ena Val d’Aran, que seràn eth 23 de junh. En aguest sens, sonque Arties, damb era Hèsta deth Taro, e Les, damb era Hèsta deth Haro, demoren damb aguesta tradicion de culte ath huec. Eth nau espaci expositiu, que gestionarà eth Conselh a trauès deth hilat de Musèus dera Val d’Aran, compdarà damb un dessenh minimalista e incorporarà elements audiovisuaus coma projeccions, taules interactives e locucions sonores, segontes remasse eth projècte iniciau. Entre es recorsi, destaque ua vintea de reproduccions e haros qu’apertien a hèstes de diuèrses poblacions deth Pirenèu. Eth prètz iniciau de licitacion se place en uns 100.000 èuros. Eth platz tà presentar aufèrtes finalizarà eth pròplèu dia 10 de deseme.