Un centre tà atrèir e retier talent en Aran

Eth coworking HèPic, eth centre d’innovacion territoriau deth Conselh Generau d’Aran, ei un equipament qu’a coma prètzhèt atrèir e retier talent en territòri. Aufrís era oportunitat de desvolopar ua trajectòria professionau en airaus especializadi, en especiau es vinculades as naues tecnologies, des d’un territòri de montanha coma Aran. Atau se despren eth balanç annau qu’a hèt eth Conselh d’aguest equipament, que promò eth teletrabalh collaboratiu ena Val, damb mès de dètz persones damb plaça fixa, e s’an trametut 68 sollicituds tà emplegar eth centre de forma temporau, damb màger concentracion en ostieu, hèstes de Nadau e Setmana Santa. Eth conselhèr d’Innovacion, Oriol Sala, apuntèc que se tracte de “un lòc a on se pòden generar sinérgies entre professionaus de diuèrsi sectors e crear naues linhes de trabalh o projèctes comuns”.

En çò que tanh ara aucupacion, eth 70% an estat usatgèrs de longa estada e eth 53,3% des sollicituds d’accès temporau an estat de hemnes. En çò que tanh ara procedéncia, mès dera mitat provien de Barcelona. Des persones qu’assistissen seguidament ath coworking, sonque dues son neishudes ena Val Aran. En dus ans de foncionament, aguest servici a propiciat dinamiques professionaus positives, en tot facilitar era conciliacion entre era passion pes espòrts de montanha e eth trabalh, e artenhent atau retier a persones innovadores en territòri.