Un pòdcast en catalan difon era cultura occitana

Enes Estats Units, concretament en Valdese, en Carolina deth Nòrd, i a un pòble en que se parle occitan. Era rason? Ac expliquen es creador deth vidèo pòdcast País Invisible en un des sòns darrèrs capítols. Es estudis de Bcn Media Hub, en Barcelona, son eth platò a on ac graven cada dues setmanes damb eth prètzhèt de difóner en catalan era realitat nacionau e culturau dera region istorica d’Occitània, “des dera Val enquia Torino”, segontes remasse era sua web. Atau, tracten tèmes de consciéncia lingüistica, folklòre, curiositats istoriques e a viatges includissen entrevistes damb personatges dera Val d’Aran o d’autes zònes de parla occitana coma es artistes Alidé Sans e Rodin Kaufman, era politica Mireia Boya o er escrivan Jèp de Montòya, entre d’auti.

Eth programa, que pòrte tres sasons e 33 capítols, some dejà mès de 50.000 reproduccions en Youtube e d’autes tantes en plataformes coma Spotify, Ivoox o Apple Podcasts. Ferriol Macip, un des impulsors e que, ath sòn viatge, ei director deth diari digitau en occitan Jornalet, expliquèc qu’eth projècte sorgic damb volentat d’apropar “ua cultura tan pròplèu ara nòsta e ath viatge tan desconeishuda coma ei era occitana”. Amassa damb Macip figuren eth comunicador Zep Armentano, vinculat ath mon deth cinèma, e eth cap de tecnics David Valls, Zaku, que tanben ei streamer e creador de contenguts, entre d’auti. Çò qu’ei curiós deth cas ei que cap d’eri ei dera Val d’Aran ne de d’autes zònes de parla occitana, totun quauqui d’eri òc que son coneishedors dera lengua. “Ei un programa orientat a un public de parla catalana, ua pòrta d’entrada tà dar a conéisher era cultura e era lengua occitanes”, explique Valls, qu’ahig qu’eth reconeishement qu’arrecep eth sòn format les encoratge dejà a trabalhar tara quatau sason. Entre eri, eth format a recebut eth prèmi ara Milhor Produccion enes Sonor 2023 e eth prèmi de Joeni influenciadors dera Euroregion Pirenèus Mediterrànea.