COMARCAS
Arties aurà ua naua via herrada d'iniciacion
Eth Petit Taro, apta tà principiants, amplie era aufèrta en municipi. Damb un recorregut de 150 mètres e 120 de desnivèu
Er inici dera naua via herrada Eth Petit Taro, en Arties. - NAUT ARAN
Er Ajuntament de Naut Aran a impulsat eth bastiment d’ua naua via herrada ena localitat d’Arties. Se tracte d’Eth Petit Taro, un itinerari de nivèu K2, apte tà principiants e qu’ampliarà era aufèrta esportiva dera zòna ath madeish viatge que daurís naues possibilitats entàs enterpreses de guidatge d’espòrts de montanha. Aguest circuit serà eth cincau itinerari verticau en municipi de Naut Aran, en tot complementar Eth Taro d’Arties -tanben coneishut coma Ròca Blanca-, de nivèu K4; era Poi d’Unha, de nivèu K4 e es de Circ dera Lua e Circ deth Solei, de nivèu K7 e K7+ respectivaments, e que son es de màger dificultat de tot er Estat.
En çò que tanh a Eth Petit Taro, era sua orientacion ei sudèst, a un desnivèu d’uns 120 mètres e eth sòn recorregut ne some uns 150. Encara non ei dubèrta ath public, ara demora d’installar-i pannèus informatius e damb instruccions de seguretat ena part iniciau. Eth temps tà amiar-la a tèrme serà d’apruprètz ua ora, ara que calerà somar-li ues autes 15 menutes d’aproximacion ath sòn inici e d’autes 20 de camin de tornada. Era enterpresa Experience Center Estudis de Muntanya i Consultoria, deth reconeishut alpinista de El Pont de Suert, Xavi Metal, a estat era encuedada d’installar era estructura, damb un pressupòst de 18.000 èuros.
Pera sua part, eth baile deth consistòri de Naut Aran, César Ruiz-Canela, explique que “diuèrses enterpreses dera zòna e agéncies de viatges mos demanèren d’ampliar era aufèrta de vies herrades ena zòna, pr’amor qu’es dificultats qu’auíem èren intermieja e expèrta, mès non de nivèu iniciau, per çò que mos semblèc ua bona prepausa tà que toti es aimants des espòrts de montanha poguen vier a gaudir d’un des milhors entorns deth Pirenèu”.
