Vielha impulse cinc projèctes tà milhorar eth Palai de Gèu

Er Ajuntament de Vielha e Mijaran a previstes substanciaus milhores enes installacions deth Palai de Gèu. A sollicitat era redaccion de cinc projèctes qu’includissen un nau sistèma de produccion de calor e climatizacion; installacions de lampisteria; desumidifacion e ventilacion; ua naua installacion electrica e d’enlumenat e un nau circuit entara piscina damb un vas de compensacion. Era enterpresa Esitec Energía ei era adjudicatària d’aguesti estudis, que compden damb un pressupòst de 150.000 èuros. “Entara equipa de govèrn, eth Palai de Gèu ei un pilar fonamentau e atau volem que sigue en futur”, expliquèc eth baile, Juan Antonio Serrano, que rebrembèc que “auem passat per epòques complicades, damb barraments obligadi pes grèus damnatges dera installacion, mès volem que pogue seguir en tot èster eth referent esportiu d’Aran e eth Pirenèu”. En aguest sens, ei er unic emplaçament d’Aran a on pòden practicar-se jos tet natacion e espòrts de gèu. D’un aute costat, eth consistòri a aquerit ua maquina de neteja en modalitat de renting pendent es pròplèu quate ans, damb eth prètzhèt de refortilhar eth servici de neteja en municipi.