Era Val d'Aran, camp d'entrenament tà astronautes europèus

Sara García Alonso, biològa moleculara e astronauta de resèrva dera Agencia Espacial Europea (ESA), s’entrene en Centre Europèu d’Astronautes en Colònia, Alemanha. Coma part dera sua formacion, visitèc era Val d’Aran en deseme tà realizar exercicis de supervivéncia en condicions d’iuèrn. S’afrontèc aquiu a temperatures de -15°C, en tot realizar activitats coma alugar huec en condicions de heired extrèm, senderisme en terrens nheuadi e passar era net ar aire liure en un vivac. Entà protegir-se excavèren petiti refugis ena nhèu e se protegiren damb lònes, en tot simular scenaris a on era capacitat d’adaptacion e era gestion des recorsi limitadi son cruciaus.

Sara García Alonso tanben ei esportista certificada en buceig, paracaidisme e krav magá, eth sistèma oficiau de luta e defensa personau qu’emplegue er exercit d’Israel, entre d’auti païsi. Recentaments a publicat eth sòn prumèr libre, Órbitas (Penguin), a on explique tèmes coma era recèrca dera identitat o eth pes des tradicions umanes.