President Puigdemont tamb Aran

Madrid se convertic hè uns dies ena plaça der oficiau reconeishement ara identitat aranesa, ara lengua pròpia d’Aran e ath nòste dret a decidir eth nòste futur.

Pendent fòrça ans e estat ua d’aqueres persones qu’a demanat, exigit e reivindicat exportar era nòsta realitat politica, identitària e nacionau dehòra de Catalonha. Ac e hèt perquè èm un cas unic en Euròpa, perquè auem de daurir-mos nacionaument, politicament e economicament. Aqueth dia a arribat! E a arribat dera man deth President dera Generalitat de Catalonha en Madrid. En melhor escenari possible entath reconeishement públic e oficiau.

Ara, ath delà de conèisher nosati çò que hèm e çò que volem, tanben ac coneishen en Barcelona, Madrid e tota Espanha. Gràcies President!

Dera man deth President dera Generalitat de Catalonha auem dat un pas entà deuant fòrça gran e important. Ara non mos podem arturar e era pròplèu estacion de parada a d’èster Euròpa. E ac auem de hèr tamb es madeishi objectius que e nomentat anteriorament, perque auem e auram de besonh dera proteccion d’Euròpa deuant d’ua amenaça evidenta de recentralitzacion que mos pòt hèr perde aquerò que pendent segles es aranesi e araneses auem defenut.

Es partit polítics aranesi auem d’èster egoistament inteligents entà retrobar-mos en benefici deth país e de toti es que i trebalham e i viuem e persutar aguest objectiu. Auem artenhut ua hita istorica, ara comencem a trebalhar entara següenta. Hèsqui ua crida as partits, as polítics, as sectors econòmics, as agents sociaus e demés entà començar a dessenhar un futur d’optimisme entàs mès petits, entàs joeni, entàs adults e era gent grana. Per nosati e pes que vieràn.