ACCIONAR O REACCIONAR
Volem mieis públics d’Aran
![Volem mieis públics d’Aran](https://imagenes.segre.com/files/image_large/uploads/2023/09/02/64f31119f2b43.jpeg)
Volem mieis públics d’Aran
Era creacion dera Acadèmia Aranesa dera Lengua Occitana per part dera Generalitat de Catalunya e eth gran trebalh qu’estan portant a tèrme es sòns acadèmics, artenh un objectiu fòrça important entà potenciar er ús sociau der aranès, prestigiar era nòsta lengua. Ei aguesta acadèmia eth prumèr òrgan institocionau e oficiau que pòt portar Aran entà tota Europa.
Potenciar e lheuar eth prestigi dera nòsta lengua ei clau entà augmentar er ús sociau dera madeisha. I a tanben un aute objectiu, en aguesta linha, que s’està trebalhant pendent hè fòrça ans, era Escòla Aranesa. Mès de trenta ans avalen eth gran trebalh qu’eth colectiu de mestres està portant a tèrme.
Mès, i a dus pilars qu’ajudaríen fòrça a complementar eth trebalh que s’està portant a tèrme entà arténher un melhor prestigi lingüístic. Per un costat, fomentar e potenciar era literatura ena nòsta lengua. E per un aute costat, auer un sistema audiovisuau pròpi. Ei a díder, auer ua TV e Radio publica d’Aran. Ei viable? vos demanaratz! e jo vos contesti, Òc. Sense cap èuro mès de çò que còste actuaument. Tant fàcil coma qu’es Delegacions de TV3 e CatRadio en Aran siguen traspassades ath Conselh Generau d’Aran. Tamb çò que còste actuaument e tamb era possibilitat legau que mos permet era Lei d’Aran, mos daurim es pòrtes a un hilat de possibilitats: mès preséncia dera lengua enes mieis, era creacion d’ua indústria de naut valor, era exportacion de contenguts, possibilitats de doblatge en aranès/occitan, era creacion d’empreses de base tecnologica pròpies, entre d’autes. Aguest ei un camín que cau començar a debater sense complexes.