Refondem Valors

Quan parli tamb gent en Aran, sò que mès me sorprèn non ei tant se ei a favor o en còntra dera indepedéncia de Catalonha, totes es opinions son respectables, sò que mès me sorprèn ei qu’entà defensar era sua posicion en còntra d’aguesta, se normalitzen comportaments pròpis de d’auti règims que non son democràcies plenes. Ei a díder, i a gent que trape normau tot çò qu’està hènt er Estat Espanhòu tamb era complicitat deth PSC/PSOE e C’s entà frenar era legitima demana de melhorar.

I a ua polititzacion dera justícia constatada? i a gent qu’ac normalize; I a presoèrs polítics? i a gent qu’ac normalitze; s’utilitze era violéncia? i a gent qu’ac normalitze; i a amenaces, seguiments e detencions ilicites? i a que gent qu’ac normalitze; fòrça d’aguesta gent a mès, se’n alegre. Qui se trape en beth supòsit d’aguesti, non a un problèma tamb era independéncia de Catalonha, a un problèma tamb eth madeish. Era rason d’èster d’ua persona non aurie d’èster jamès eth desir deth mau ar aute, senon era defensa rasonada deth sòn posicionament. Er òdi jamès pòt èster eth camín dera solocion, se ei atau, era democràcia qu’auem ei malauta.

Se era societat, ei a díder, se toti e totes normalitzam e justificam depèn quines actituds, damb per hèt qu’era confrontacion politica ja sonque serà entà uns pògui. Auram perdut era esséncia de çò qu’a d’èster ua Democràcia Plea en sègle XXI (un Estat, eth principi de legalitat e participacion democratica). Se normalitzam e justificam era pèrta de drets individuaus e colectius a ua part dera poblacion perquè auè mos convèn, demàn seràn uns auti qui les perderàn e londeman uns auti. Lèu ac lamentaram toti. Se acceptam aguesta societat binària e egoista eth futur serà escrit sonque pes de naut, es de baish seram sotmetuts.