Convivéncia, pluralisme

Aguest passat dimenge, coma dejà sabetz, s’an celebrat eleccions generaus. E tanben, coma sabetz toti, en tres setmanes se celebraràn eleccions municipaus, ath Conselh Generau d’Aran e ath Parlament Europeu. En tot just un mes s’aurà pogut escotar, enténer e compréner sò que ditz era societat, en toti es nivèus, a trauèrs des urnes.

Des eleccions generaus en trèigui quauqua conclosion generau: era prumèra, rehús ara extrèma dreta; dusau, dialòg en conflicte polític entre Catalonha e Espanha; tresau, e mès importanta, era societat a parlat a trauèrs des urnes, tamb ua participacion massiva, e eth camín d’aqueth dialòg passe, tanben, pera esséncia mès pura e participativa d’ua democràcia.

A partir d’aguest brèu analisi, es matisi son fòrça e eth camín fòrça complicat. Eth men prumèr conselh serie que comencen a hèr politica de naut nivèu. Era intelectualitat se demòstre non s’explique.

Eth 26 de mai, serà eth torn dera societat aranesa. Eth plantejament, aguest viatje, ei fòrça nauedós e plurau. Veiram s’aguesta pluralitat se traslade en representativitat enes nòstes institucions. Serà fòrça interessant hèr-ne analisi des resultats e composicion. A totes es fòrces politiques que se presenten les demanaria sonque dues causes: era prumèra, protegir era convivéncia deth pòble aranès, en tot auer actituds critiques constructives e sajar qu’eth debat polític non traspasse era esfera de trebalh en àmbit polític; e dusau, trebalhar amassa totes es fòrces entà qu’es nòstes institucions, ath delà dera pluralitat, poguen assomir intrinsecament e extrinsicament eth pluralisme existent en nòste País enes pròplèus ans. S’ac artenhem, guanharam confidança, guanharàn identitat e guanharam País. Serà un exemple de naut nivèu.