Analisi 26M

Toti nosati hèm coneishedors de situacions colectives, politiques, sociaus, economiques e d’autes qu’an succeït en aguesti quate ans e coma es partits aranesi an anat aufrint respòstes ad aguestes. Sense dobte an influït d’ua manèra decidida en depòsit deth vòt (dera confidança) entà dar-la’c a ua o ua auta candidatura.

Entà ajudar ar analisi vos recomani era lectura dera columna que publiquè hè un temps tamb titol: “Entre clans e tribus”, la podetz trapar en Internet.

E se ath delà guardatz coma era societat s’a individualitzat a conseqüéncia dera globalitzacion, tanben ac hè escrit en diuèrses columnes en aguest madeish espaci, en toti aqueri ahèrs qu’era persona prioritze e protegís entath sòn interès poderatz trapar patrons de conducta fòrça estables.

Per ua auta banda, s’an presentat mès candidatures que jamès e aguestes non an influït de manera destacada ena composicion finau des institucions araneses. N’i a inclús que tot e auer guanhat eleccions en Aran, demoren sense representacion. Ua des conclosions en aguest sens ei qu’es candidatures an d’anar acompanhades d’un projècte polític entà Aran, sense aguest non s’artenh era confidança.

Unitat d’Aran/PSC a artenhut un gran poder institucionau. Dera gestion qu’en hèsque, m’atrevisqui a dide’c dejà en aguesti moments, en depenerà fòrça eth resultat des pròplèus eleccions. Calerà vèir, tanben, coma CDA-PNA e Amassa gestionen era oposicion. En cas deth prumèr, inclús, coma dar respòsta as naui plantejaments derivadi des resultats artenhudi. A toti les recomanaria gestionar es emocions des dera ponderacion; ne tot ei blanc, ne tot ei nere, e non desbrembetz que “tot ei impossible mentre ac semble”.