“Caos” polític

Hè ues setmanes escriuia qu’era nòsta societat ei plurau (politica, culturau, linguïstica, identitària, ideologica, eca) positiva e enriquidora. Mès eth problema ei, que tot e auer ua societat plurau, era politica, auè, non ei inclusiva enes institucions publiques representatives. Era actitud s’accentue quan era victòria, o era governabilitat, s’artenh per majoria absoluta, alavetz “eth rodillo” ac revente tot.

Per méter un exemple actuau; eth PSOE ei eth guanhador des darrères eleccions, Podemos interprete qu’à era clau. Arribe era “negociacion” e se daurís un panorama en que negociar sonque auvedís a guanhar o perde. Aquiu radique eth problèma de hons. Era politica, d’auè, non acabe d’enténer que se guanhe o se perd poder de representacion enes elecccions e qu’un viatge qu’aguestes s’an celebrat existís era obligacion a negociar elements programatics, resultat des urnes. Aguesta dolenta cultura, impregnada d’ua manera important en toti es nivèus, mos pòrte a que non i a age acòrds polítics importants. D’aguesta realitat era ciutadania e es empreses en patim es sòns efectes negatius. Tamb sorpresa, e tanben decepcion, era societat que dejà s’a expressat, enes urnes, e qu’en nòste dia a dia coma ciutadans arribam a meter-mos d’acòrd en fòrça causes, non entenem qu’era classe politica, actuau, non en sigue capaça. D’aquiu tanben ven era desafeccion ath sistèma institucionau e polític.

Eth pluralisme ei inclusion, tolerància, cooperacion e collaboracion tamb dera pluralitat, sustot tamb es minories. Era societat contunharà siguent plurau, ei inevitable, e sense ua cultura de nautada politica fòrça gent non se veirà representada enes institucions publiques, que cau rebrembar an d’èster de toti e totes. Aguesta, ei era base fonamentau dera qualitat democratica e institucionau.