Sentenciadi

Es condemnes de prision qu’an queigut ath dessús de persones innocentes peth “procès”, ath delà d’injustes, non tanquen ne sentencien absolutament arren. Ath contrari, ac daurissen tot per temps indefinit. Encara que se produsisque eth pitjor escenari institocionau possible, aguestes condemnes anaràn de generacion en generacion, de libre en libre, era violéncia der 1 d’octobre en serà era pròva de hèts. Era violacion permanenta dera separacion de poders que practique er Estat Espanhòu serà eth germen dera sua autodestruccion en temps.

Er Estat, ara comandat per un aute partit, a decidit contunhar autoprotegint-se ad eth e as sòns èlits governants des canvis qu’era societat exigís e d’aquerò que Catalonha demane. Reitère en relat contra er Independentisme e utilitze, aguest relat, entà amagar hèts e conseqüéncies mès grèus. Sò segur qu’eri ac tornaràn a hèr.

En Euròpa an dat eth vist e platz ad aguesta autoproteccion per ua mancança clara d’alternativa e pòurs. Eth Trumpisme a arribat ena Euròpa d’auè, tanben, sò segur qu’en gesserà dera Euròpa de deman.

E mentre er Estat practique ua estratègia clara d’eliminacion, en Catalonha auem ua classa politica mediocre que non auvedís ath nivèu dera exigéncia que requerís eth moment ne dera estratègia que calerie auer entà esvitar maus majors, entre nosati, e era autodestruccion dera institocionalitat. Cau nivèu e dialòg e, auè, non auem ne ua causa ne er auta. Ne en un costat ne en er aute.