Aran contra Covid-19

era grèu crisi sanitària qu’estam viuem, coma conseqüéncia deth COVID-19, mos a hèt ua fotografia de País. E tamb plea satisfaccion vos e de díder que m’en sentisqui prohondament orgolhós dera gent quan guardi era fotografia que mos a quedat.

Cau rebrembar qu’eth dia 13 de hereuèr eth mon dera tecnologia e dera empresa, a nivèu mondiau, lançaue ua adverténcia a Euròpa e ath mon, se suspenie eth Mobile World Congress que s’auie de celebrar en Barcelona entre eth 24 e eth 27 de hereuèr. Eth 25 de hereuèr se confimaue eth prumèr cas de Coronavirus en Catalonha. Eth dia 3 de març en Espanha dejà i auie 122 casi, des quaus 29 en Madrid. Eth dia 9 eth COVID-19 arribaue en Lhèida, en Espanha, mentrestant, se compdauen 1.231 persones infectades. Eth dia 11 era OMS declaraue era Pandèmia Mondiau. A partir d’queth dia era gent d’Aran reaccionèrem tamb rapidesa e responsabilitat. Era pòur sociau amassa tamb era responsabilitat de Baqueira Beret SA, convidèren ara melhor decision, eth barrament dera estacion. Pògues ores dempús otèls, bars, restaurants, comèrci e demés anonciauen eth tancament des establiments per responsabilitat deuant dera pandèmia. En pògue ores Aran convidaue a gésser deth País a milers de persones. Aguesta decision, prenuda entre toti, a evitat fòrça afectacions. Quin gran exemple entara istòria. Toti e totes siguèrem aranesi, un solet País. Gràcies! A partir d’ara, quan dehòra vos diguen que èm diferents podetz sentir-vos orgolhosi d’estar-ne.

Desiri ua rapida e positiva recuperacion as que se trapen en situacion de quarentena e ingressadi. Vage per deuant eth men reconeishement a totes e toti es que trebalhen en àmbit dera salut e assistenciau, sigue quin segue eth sòn ròtle, categoria e foncion.