Euròpa, era oportunitat

Er acòrd artenhut en Conselh Europeu ei istoric. Ath marge der impòrt des plans aprovadi, era transcendéncia deth contengut ei disruptiva. Euròpa a decidit dar un pas entà deuant ena linha d’ua naua governança. Era mutualitzacion deth deute europèu compartit peth conjunt des estats membres que le compausen, ei er inici d’un camín que fòrça reclamauem.

Ei notòria era diferéncia “en temps e forma” dera reaccion qu’agut Euròpa. Atau coma en 2008 reaccionec tard e dobtosa, aguest viatge ac a hèt en temps e tamb guardada longa. Aguesta decision compòrte era entrada d’ua naua governança, tant exigida, entà enfortir eth projècte comunitari.

Se leigetz er acòrd (era letra petita), Euròpa a decidit prioritzar linhes d’accion e reforma e propòsits de creishement que demoren fòrça definits, mès enlà des pròpi estats. Aguest nau redireccionament comunitari pòt beneficiar e fòrça as regions, coma Catalonha (e Aran). En aguesta linha, ei imprescindible qu’es empreses, empresaris e autònoms siguen coneishedors dera oportunitat, exigents tamb es sòns govèrns territoriaus e locaus, e Catalonha, e Aran, siguen ambiciosi. Entà artenhèc mos auem d’aluenhar de debats esterils, e començar a trebalhar en ua constroccion ambiciosa e de futur que diboishe es linhes entà garantir era actualitzacion des projèctes en sègle XXI. Er acòrd nacionau entara recuperacion economica aprovat en Catalonha e pògui dies, evidéncie es mancances qu’existissen ena lectura des reptes, tendéncies e risqui as qu’auem de hèr frònt individuau e collectivament.