“Pandora” papers

Dempús d’un loable trebalh d’investigacion periodistica en tot eth mon entà esclarir transparéncia, s’a presentat un nau capítol de mala praxis generalitzada, es “pandora papers”. Pendent uns dies èm conscients der enganh e dera presa de pèu ena que mos hènt víuer, passadi uns dies normalitzaram era situacion tamb un “toti son iguals”, l’acceptaram e enquiath pròplèu capitol.

Conscient qu’aguesta ei era actitud majoritària deth qui s’exprese, non dèishe d’éster evident qu’aguestes males praxis an consequéncies laguens des comunitats, siguen granes o petites, e mos conviden a toti, coma persones, a apropar-mos a ítems conductuaus contraculturaus e antisistèmics.Tamb aguest seriau de corrupcion e evasion fiscau continu e perlongat en temps, ei lògic qu’es naues generacions s’aluenhen des relats, formes e sistèma que les provòque.

Ar adoptar era generalitzacion deth relat e eth non castig coma respòsta deth sistèma es persones s’aluenhen d’aguest e s’empodèren d’elements que non son entenedors per part des generacions “retro” que convíuen amassa ena societat. D’aquiu eth distanciament intergeneracionau cada viatge mès evident, de retruc cada viatge mès dificila de resòler sigue quina sigue era unitat de convivença sociau e/o familiara.Eth sistèma institocionau s’està autodestruint, provocat per interès de conservar era parcela deth qu’auè la domine, sense pensar qu’aguest domini de curta guardada condemne era confidança sociau e ciutadana maumetent es estructures enes que pivòte era democràcia liberau que coneishem.

.