Era gripalitzacion

Lèu arribaram as dus ans d’ua pandèmia qu’à deishat peth camín milers de mòrts, d’efectes negatius, de crisis e de repercussions auè encara desconeishudes. Mès, era variant Omicron pòt canviar, segontes es experts, es regles de jòc tamb es qu’es govèrns de tot eth mon an actuat. Segurament a arribat eth moment d’ua gripalitzacion massiva entà arténher era “comunidad de rebaño” coma en diden es experts.

Non ac auem artenhut tamb era vacunacion, en grana part pera insolidaritat deth prumèr mon tamb era resta per non pensar mès enlà deth nòste melic. Escotaua agèr ena emisora lider en Catalonha coma eth Conselhèr d’Educacion deishaue dit que tamb es protocòtles que s’apliquen enes escòles auem canviat era estratègia d’afrontar era solocion definitiva e guanhar ara pandèmia. Segontes paraules deth Conselhèr mos contagiaram toti, tanben segontes argumentaue es efectes d’ua gripalitzacion tamb aguesta varianta son lèus e ena majoria des casi asimptomàtics.

Se reafirmaue en qu’eth virus auie vengut entà demorar tamb nosati entà tostemnp e era vacunacion serie obligatòria de manera periodica.Arribats ad aguest punt, s’aguesta ei era conclosion era quau non critiqui ja que es experts en saben mès que jo, perquè non retiren totes es mesures e restriccions que obliguen, diden era vertat e assomim era nòsta resposabilitat coma persones e actors d’aguest mon?Un des problemes dera politica, e de retruc des polítics o persones que exercissen era politica, ei que non son capaci de gésser en carrèr, parlar tamb era gent, auer empatia e an pòur a éster sincers pes critiques que poguen auer enes hilats sociaus. S’amaguen dera sua personalitat pes consequéncies que pòden auer es sues decisions, ben siguen dehòra o laguens de casa.