‘Alcarràs’

Carla Simón s’a convertit ena prumèra directora cinematografica guardonada tamb er Os d’òr, eth prèmi mès important dera “Berlinale”, pera pelicula Alcarràs. Coma vesín des Terres de Lhèida ua grana satisfaccion. Mès, en tot deishar hius de sentiment a un marge, era directora Carla Simón merite un agraiment perquè era pelicula Alcarràs, entà un servidor, artenh un hilat d’èxits que cau méter en valor.Per ua banda, per auer escuelhut un pòble d’interior des Terres de Lhèida coma escenari d’ua istòria, d’un relat e d’ua vertat que trinque fòrça estereotips.

Se ben ei vertat qu’eth pòble d’Alcarràs està intimament ligat ara istòria personau dera Directora non dèishe d’éster ua valentia. Tanben ua senhau de trincament tamb es marcs mentaus rígids pre establerti. Per ua auta banda, artenh un aute èxit perquè traslade ath mon ua realitat amagada coma ei era pagesia.

En un mon a on es persones an mancança d’empatia respecte ara profunditat, era directora Carla Simón a estat capaça de trasladar ath uelh der espectador ua realitat fòrça dura, invisible, abandonada e en fòrça ocasions mautractada. E ac a hèt tamb ua sensibilitat pròpia d’ua persona que sent sua aguesta realitat.Un tresau èxit perquè Carla Simón s’a convertit ena prumèra directora der estat en arténher aguest prèmi de reconeishement e trascendéncia mondiau. E, un darrèr èxit que voi méter en valor, era pelicula Alcarràs à estat rodada en català, ua eroina.Que siguen aguestes linhes ua felicitacion entà Carla Simón e ath sòn equip e ath pòble d’Alcarràs.

Que servisque tanben aguest article d’aumentage entà tota era pagesia e era ramaderia, vertadèrs patriòtes e abanderadi dera vertat e dera luita.