Tèrra Aranesa

Dissabte passat era Fondacion Privada Musèu Etnologic dera Val d’Aran presentèc as sòcis e ara poblacion en generau, era naua revista Tèrra Aranesa en sòn numèro 19 dera dusau etapa, n’i a 11 numèros dera prumèra, aguesti de format mès petit, mès era finalitat ère era madeisha. Ei ua revista que ges un còp ar an e ei era unica qu’ei totaument en aranés. Era revista neishec tamb era finalitat de dar a conéisher era istòria, eth patrimòni, era cultura, era natura,… d’Aran.

Hè possible era connexion de diuèrses disciplines. Es objectius son era investigacion e era divulgacion, per açò es membres dera Fondacion èm convençuts de que vau era pena contunhar tamb aguest format. A clarament mercades dues seccions, ua prumèra que recuelh eth trabalh d’un an dera Fondacion e des sues dues seccions: Lengua Viua que velhe pera promocion dera lengua e Amics de Montgarri que se n’encuede dera milhora e conservacion der auviatge deth Santuari de Montgarri, e era auta conten es articles.Cau subergésser eth caractèr participatiu e volontariós des autors des articles, que son persones vinculades tamb eth país e que les shaute investigar sus un airau en concrèt o son expèrts en ua tematica tà dar-les a conéisher ara rèsta.

Gràcies a toti es que i an participat ath long des ans. Articles de qualitat que contribuïssen ath coneishement collectiu, qu’apòrten materiau entà que d’auti investigadors ac amplien e que pòden èster utilizats per totes aqueres persones que i agen interès. Era Fondacion ei dubèrta a recéber articles tà publicar-les, tostemp que compden damb ua tematica restacada tamb Aran e ua informacion precisa e verificable.Comence eth sòn camin eth numèro 20!!!