Violéncia de genre

Ena Viquipèdia deuant dera entrada de violéncia de genre e entre era sua definicion, trapam eth diboish deth pintor Goya titolat “Dona maltractada amb un bastó”, ei dera sua etapa en Bordèus (ath torn de 1874). Es diboishi hèts pendent aguesta epòca, an un caractèr costumista e recuelhen estampes dera vida vidanta. Mos semble qu’ei darrèrament quan se’n parle de violéncia contra es hemnes, mès coma podem veir ja ven de temps endarrèr.

Tostemp i a estat!, mès açò non ei excusa. Eth passat 25 de noveme entàs 13 ores s’amiaue a tèrme un acte en Poliesportiu de Vielha en contra dera violéncia de genre, a on participauen es escolans der IES d’Aran tamb pannèus, escrits e manifestacions enes diferentes lengües qu’aprenen en centre, per cèrt plan encertats e felicitacions tada eri. Mès qué vò díder açò? Actuaument i a ua identificacion e ua aproximacion ath fenomèn mès grana, s’a hèt pedagogia, es generacions que van passant pes centres escolars de cada còp son mès coneishedors e son en contra pr’amor qu’atau se manifesten, alavetz qué passe? Dilhèu influís un usatge des naues tecnologies non corrècte? Era joenessa ei un moment clau pera sua transicion entara edat adulta, per aquerò ei de besonh que siguen agents actius ena luta contra es violéncies de genre.Eth respècte des drets umans damb independéncia dera edat, eth sèxe, era situacion economica o quinsevolh ua auta diferéncia, son elements essenciaus entà mostrar eth respècte entre toti, que segontes Kofi Annam: “era violéncia contra era hemna ei possiblament era mès vergonhosa violacion des drets umans.

Mentre contunhe, non poderam afirmar qu’auem reaument auançat tara igualtat, eth desvolopament e era patz”.