Salut mentau!

Tèrme qu’un temps ençà sentem massa soent, malerosament. Semble qu’ena actualitat ei una des preocupacions principaus des govèrns deth mon. Eth confinament e es restriccions pendent era pandemia accentuèren aguest problèma de salut publica.

Era OMS la definís coma “un estat de benèster ena qu’era persona ei conscienta des sues capacitats, pòt afrontar es tensiones normaus dera vida, pòt trabalhar de forma fructifèra e hèr ua contribucion ara sua comunitat”. Era salut mentau ei quauquarren que se trabalhe dia a dia, des dera vida vidanta e es relacions umanes. Ei plan important aufrir orientacion, atencion e supòrt as persones e as familhes.

Es trastorns mentaus an un gran impacte ena qualitat de vida des persones, pòden ath delà incrementar eth risc de patir d’autes malauties o generar discapacitats o dependéncia. Afècten er estat d’esperit, eth pensament e era conducta. Pòden derivar en ua depression o ansietat, entre d’autes, causa que les pòrte a hèr front ara estigmatizacion e era discriminacion que patissen.

Ei un ahèr que se restaque en totes es etapes dera vida, des dera enfància, adolescéncia, adults e inclús ena vielhesa. Per tot açò, ei ua prioritat entàs govèrns, qu’anarà acompanhada d’un increment enes pressupòsti entà potenciar es estratègies. Eth Departament de Salut determine es linhes directiues entà impulsar, planificar, coordinar e avalorar es actuacions a desvolopar ena promocion dera salut mentau.

Eth sòn tractament enes mieis de comunicacion a d’èster rigorós, respectuós e responsable. Invertir en salut mentau ei ua inversion en ua vida e un futur milhor entà toti!