Eth Temps

“Parlar deth temps ei pèrder eth temps!” Famosa dita qu’a tota era rason. Parlar deth temps ei un bon tèma entà començar ua convèrsa. Pèrder eth temps ei ua bona manèra de guanhar-lo.

Eth temps ei un recors primordiau qu’auem toti e non tostemp lo sabem aprofitar avientament, era manèra en qu’administram eth nòste temps mos pòrte a ua manèra de víuer. Auem d’apréner a administrar eth temps en tot identificar es prioritats, atau lo planificaram e guanharam en benèster.Tà tot i a un temps: temps entà nèisher e temps entà morir, temps entà parlar e temps entà carar (jo higeria tanben, temps entà escotar, qu’actuament còste respectar eth torn de paraula), e cada causa en sòn temps. Víuer eth moment intensament coma se siguesse eth darrèr, pr’amor qu’en aguest mon i èm un temps.

Arren podem hèr tà arturar-lo. Coma didie Seneca: “Tot mos ei alièn, sonque eth temps ei nòste.”Prumèr podem parlar deth concèpte temps per çò que hè ath fenomèn climatologic, mos informe de quin temps hè en moment actuau. Mès, tath mot temps li aplicam fòrça significats, i a plan dites, arrepervèris que hèn referéncia ath temps, atau eth concèpte ath mau temps bona cara, dita que tiem entà recomanar a quauquarrés qu’afronte bèth malastre tamb alegria e decision.

O auer eth temps ath dessús, aqueth que voleríem entà acabar milhor ua activitat o simplament tà gaudir d’era. Cada causa en sòn temps, coma era nhèu tath mes d’auents, mos vò díder qu’ena vida cada causa en sòn moment. Que cau préner eth temps com arribe e es sòs ath sòn cors, es boni moments cau aprofitar-les quan arriben; e entà acabar auem tot just entrat ena primauera e coma ditz era dita, tà Sant Jusèp tot audèth que bastís eth sòn castèth, veiram s’eth bon temps permeterà ua naua organizacion!