Agost

S’acabe eth mes d’agost, eth ueitau mes der an e qu’a trenta un dies, per norma seguint era serie, tocaue èster de trenta, pr’amor que junhsèga tanben ei de trenta un. Existís ua legenda que ditz que pr’amor qu’aguest mes hè aunor ath nòm der emperaire roman Octavi Augusto e que siguec eth qui determinèc treir-li un dia ath mes de hereuèr, mes de Iulius, tà guanhar-lo eth. Semble èster que des de Julio Cesar, 45 ans AC, ja ère de trenta un dies! Moment en qu’es toristes tornaràn tà casa sua e es nòsti, es deth país, tornaràn pr’amor que cau començar a premanir eth nau cors des mainatges, qu’enguan comencen abans, e era tornada ath trabalh, ara rotina, … qu’entà uns serà positiua e entà d’auti, coma se les a hèt cuert, non les shaute bric tornar-i.Auem agut ues temperatures que non an estat normaus en Aran, portam un parelh d’ans qu’arribam a uns grads non abituaus.

Mantier-se a 34/35º a estat era tonica de fòrça dies d’aguest mes d’agost. Auem gessut enes notícies deth temps, causa que generaument passe en iuèrn mès non en estiu. Ei vertat qu’eth cambi climatic i deu d’influïr! Es estiuejants an podut gaudir dera montanha e des petiti pòbles, pr’amor que non a ploigut cap dia.

N’auem agut fòrça visitaires, qu’auràn coneishut eth nòste petit país e que demoram se n’empòrten un bon rebrembe tà tornar. Restacam eth mes d’agost damb er estiu, era plaja, eth solei e coma non damb era calor. Semble que pendent aguesta dimenjada ja baisharàn es temperatures e dilhèu tanben arribaràn es tronades, veiram.

Passetz un bon dia e acabetz d’aprofitar aguesta darrèra setmana d’agost, seteme ei aquiu!.