MOTS
Era Còlha
![Era Còlha](https://imagenes.segre.com/files/image_large/uploads/2023/09/23/650e7bd082cb6.jpeg)
Era Còlha - SEGRE
Aguesta dimenjada passada venguem de celebrar es 50 ans deth grop de dances folcloriques era Còlha de Santa Maria de Mijaran. Aguesta neishie e baraue per prumèr còp, un 8 de seteme de 1973 tamb motiu dera Hèsta Major de Vielha. Mès abans siguec de besonh un temps entà cercar es dances, era musica, premanir era ròba e es dies d’assag. Tot açò gràcies ath trabalh de dues persones, es senhores Lolita e Angelina e sense desbrembar a Cisco de Vilac tamb era sua acordeon siguec ua pèça capitau.
Gràcies peth vòste trabalh.Pendent aguesti ans s’a anat evolucionant, se comencèc barant dances mès populares e tradicionaus coma podie èster era Morisca o eth Puntet, mès gràcies ara recèrca e ath rebrembe de gent grana, s’an introdusit fòrça d’autes dances en repertòri.Ei dejà tradicion barar enes hèstes majors des pòbles, en eveniments importants que s’amien a tèrme en territòri e coma non, enes escambis tamb d’auti grops e en festivaus que i èm convidats, ei atau qu’auem recorrut fòrça lòcs de Catalunya, Espanha o er estrangèr en tot portar era nòsta tradicion ben luenh.Pogui díder que gràcies ath trabalh d’aguesti ans, s’a artenhut formar ua grana familha, coma s’a demostrat en aguest darrèr espectacle e atau se cante en sòn recent Imme estreat, un imme que recuelh perfèctament eth sentiment des persones que ne formam part. Tanben cau arregraïr er ahèr des musicaires, trabalh excellent, tostemp i son aquiu.Era paraula “Còlha” se cercam eth sòn significat te ditz, entre d’auti, qu’ei un grop d’amics o companhs d’ua activitat, mès ei ua paraula curiosa, tamb un sentit mès ample, que convide a compartir e que i èm liurament. Açò hèm era Còlha de Sta. Maria de Mijaran amassar-mos a trauès des dances un bon pialèr d’amics!