Seguim...

Hè uns dies s’acabèren es hèstes de Nadau, dies de crompes, dinars, presents, visites de familhars e d’amics, anar d’un lòc entà un aute. Bèri uns ja auem trèt eth Presèp, er arbe, es lums, d’auti demoraràn enquiath dia dera Candelèra, 2 de hereuèr, coma ditz era tradicion. Coma per art de magia an passat es dies e còste tornar ara normalitat! Ara seguirè tamb eth mèn ahèr des der Institut d’Estudis Aranesi- Acadèmia aranesa dera lengua occitana, des dera Fondacion Privada Musèu Etnologic dera Val d’Aran, des de Lengua Viua, des dera Parròquia o des deth Conselh Generau d’Aran, coma non, trabalhant tostemp peth mèn petit país, Aran, en tot aufrir eth mèn graet de sable en desvolopament, promocion, recèrca, milhora, dera nòsta lengua, cultura o istòria, atau coma arténher, de mès en mès, eth benèster des persones.Assistirè a amassades, escotarè naues prepauses, aportarè idèes, premanirè activitats. Seguirè celebrant eveniments com aniversaris, batialhes, maridatges, sopars tamb familha o amics. Realizarè bèth viatge, bèra gessuda esporadica, encara que sigue tà crompes o visites mediques. Tanben me traparè tamb bèth “espant”. Ei era vida vidanta, tamb inesperats viraments pendent aguest recorrut pera vida. Seguirè suenhant dera mia familha, gaudint des arrehilhes.Escriui en prumèra persona, mès de ben segur que quinsevolh lector/a se i pòt identificar, sonque cambiant eth nòm dera institucion o ens que represente. Aguest ei eth mèn desir entad aguest nau an, que seguim, aumens, coma enquia ara, qu’eth víuer non sigue ua rotina, que cerquem tostemp aquerò que mos aumplís e mos hè erosi. Endauant!!!