Libres

En tot apropar-se era diada de Sant Jòrdi, aprofiti entà parlar de libres. Des des origens dera umanitat i a agut eth besonh de transméter contenguts qu’explicauen era situacion que se viuie ena epòca, mès tanben pòc a pòc s’anèren introdusint tèmes reaus o ficticis entà gaudi, entreteniment des persones o simplament entà auer coneishements. En aqueres prumères pintures rupèstres quan representauen scènes dera vida vidanta ja ère un libre ena ròca.Liéger un libre en papèr ei era forma universau d’accedir ara lectura, mès es formes an anat evolucionant a long des ans. Es audiolibres quina revolucion! tamb es uelhs barrats poder escotar es granes òbres dera literatura universau, version digitau eth libre electronic o era introduccion en mercat de nombroses plataformes que balhen naues alternatiues de lectura. Atau donc, auem plan opcions entà liéger, entà entrar en mon dera ficcion, qu’ei era milhor manèra d’enténer eth mon reiau. Aguesti darrèrs son libre de veire. Ben sigue coma sigue, toti son libres e era experiéncia lectora ei era madeisha, agradarà mès o mens, jo personaument encara preferisqui eth papèr, tier eth libre, auer-lo fisicament. Des d’aguestes linhes e a tres dies de Sant Jòrdi, les voi animar a liéger e se pòt èster en aranés. En totes es lengües ei interessant liéger, mès era nòsta n’a de besonh, tà dar-li era importància que merite. Des der Institut d’Estudi Aranesi-Acadèmia aranesa dera lengua occitana, mos aufrissen libres revirats ar aranés corresponents ara literatura universau entre d’auti o ne podem trapar enes libreries , libres d’autors autoctòns que tostemps aportaràn relats que deisharàn tralha. Gauditz dera lectura!!!