Era democràcia tanben

Diuèrsi interèssi se jòguen en camp dera geopolitica, mès d’aquiu a insinuar qu’era guèrra d’Ucraïna ven motivada pòc mens que per Estats Units, segontes bèth analista e politic, i a un abisme. Tà quauqu’uns, eth tòrt l’a tostemp er imperalisme ianqui. E tà uns auti, proven encara d’ua confabulacion mondiau deth comunisme, d’ençà d’un país, Rússia, a on impère eth capitalisme des oligarques.

Er intellectuau Jean-François Revel escriuie que “era ideologia ei un huec de credences que, encara que devastador, pòt enflamar noblament es esperits”, mès que “ath finau, se degrade en un sindicat d’interèssi”. Serie eth corròp d’idèes d’aqueri que non an idèes pròpries, a on, per miei dera mentida, “era prumèra fòrça que govèrne eth món”, s’utilize era realitat exteriora entath combat politic mès triviau. Aguesta qu’ei era ideologia en mau sentit, quan mos güege pensar, encara que ideologia ei tanben ua forma particulara e ath temps universau de precomprenença deth món.

Er uman a ua imatge d’eth madeish e deth món, que conforme un esperit, era maxima deth quau ei realizar era sua libertat. Per açò, mos inquiete tant redescurbir era feblesa dera democràcia, dera sua posicion minoritària en món, dauant de poténcies autoritàries. Era guèrra actuau mòstre tanben que, maugrat era politica invasora deth món occidentau e des intrinsècs deficits democratics, “es democràcies representatives modèrnes non se hèn era guèrra entre eres”, coma ditz Robert A.

Dahl. Segontes John Dunn, era democràcia ei “era luta decidida per mielhorar es circonstàncies practiques dera vida e per escapar dera coaccion arbitrària e persistentament brutau, e tanben era determinacion e eth desir d’èster tractats damb respècte e cèrt grad de consideracion”, que tota guèrra hè a sautar pes aires.