Alibri

Lèu ena cantoada deth carrèr de Balmes, tan pòc acuelhedor entath passant, damb era Gran Via, encara mens umana, acampe un petit drapèu que mèrque discrètament era entrada entà Alibri, qu’entà esvitar confusions refortilhe, entre parentèsis, era sua condicion d’antiga libraria Herder, atau coma la coneishen encara fòrça exestudiants de Filosofia dera Universitat de Barcelona. Totun, era Herder, Alibri d’ençà de hè mès de vint ans, sauve ua des seccions mès neurides de filosofia de tota Barcelona, se non era melhor, sense desmeritar-ne d’autes (ben pògues, tot ac cau díder). Non pòt èster d’ua auta forma entà ua casa d’origina germanica.

Ua libraria ei ua perdicion, e per açò, cada còp que baishi tath caplòc catalan, sagi de pèrder-m’i entre es sòns libres. Alibri te suspren tostemp damb bèth tresaur desconeishut ath hons dera planta baisha, aquiu a on compartissen un espaci austèr, lèu entutat, er airau filosofic damb es cornèrs des religions e era teoria literària e estetica. Aquiu, en silènci, i demori solet longues estones e, de tant en tant, les compartisqui damb bèth estudiant ara recerca dera lectura obligada entara assignatura corresponenta o damb bèth jubilat encara atent as darrères novetats deth pensament.

Damb eth temps, era vida a volut qu’aguesta libraria sigue, ath delà, er scenari preferent entàs presentacions en Barcelona deth nòste hestivau literari Black Mountain Bossòst. Mès, era filosofia non ei entà guaire alegries, e dilhèu per açò tanben, Alibri ven d’anonciar eth sòn barrament, a pòc de complir eth centenari, en aguesti tempsi de crompa e anoncis de mòrt de quauqui hilats sociaus, ua mòrt que, ath contrari dera des libraries, dilhèu melhorarie eth progrès morau dera umanitat. Mès, quin sentit a ua vida ena quau morissen es melhors libraries?